Katër persona kanë mbetur të lënduar si pasojë e një aksidenti trafiku që ka ndodhur pasditen e sotme në autostradën “Dr. Ibrahim Rugova”, në kilometrin e 40-të, në zonën e Duhles së Suharekës.
Në aksident, i cili është raportuar rreth orës 14:00, kanë qenë të përfshira tri automjete.
Rastin e ka konfirmuar zëdhënësi i Policisë së Kosovës, Daut Hoxha, i cili ka bërë të ditur se njësitet përkatëse policore kanë dalë në vendin e ngjarjes.
“Referuar informacioneve nga terreni, ju konfirmoj se një aksident trafiku me përfshirjen e tri automjeteve është raportuar rreth orës 14:00, në autostradën ‘Dr. Ibrahim Rugova’ km 40, në Duhël të Suharekës. Në aksident raportohet për katër persona të lënduar, ndërsa për shkallën e lëndimeve të tyre mund t’i adresoheni shërbimeve shëndetësore”, ka deklaruar Hoxha për Gazetën Sinjali.
Ende nuk ka informacione zyrtare për gjendjen shëndetësore dhe shkallën e lëndimeve të personave të përfshirë në aksident.
Sipas Policisë, Njësia për Kontroll në Autostrada është duke trajtuar rastin dhe po zhvillon hetimet për të përcaktuar shkaqet e aksidentit.
Klikoni KËTU për tu bërë pjesë e kanalit të TV Prizreni në Youtube.
