Një kamion ka dalë nga rruga në hyrje të Kukësit dje gjatë mbrëmjes.
Si pasojë e kësaj është bllokuar qarkullimi i automjeteve. Kamioni me targa të Kosovës po transportonte shufra hekuri, kjo ka shkaktuar edhe kolona të gjata në të dyja anët e rrugës.
Ndërkohë mëngjesin e kësaj të marte është bërë e mundur edhe zhvendosja e kamionit dhe rivendosja e qarkullimit të lirë të mjeteve. Ngjarja ka ndodhur mbrëmë rreth orës 23:00 por vetëm sot rreth orës 7:00 të mëngjesit u bë e mundur zhvendosja e tij dhe rivendosja e qarkullimit të lirë të mjeteve.
Për zhvendosjen e tij në fillim është dashur zbarkimi i sasisë së hekurit në një kamion tjetër, proçes që ka sjellë edhe bllokimin e rrugës për pak kohë duke krijuar kolona të gjata në dy anët e rrugës.
Ky aks është i vetmi në të cilin është zbarkuar i gjithë trafiku i mjeteve që udhetojnë nga Kosova drejt Shqipërisë dhe anasjelltas, pas bllokimit të segmentit 3 km në Kukës- Morinë të rrugës së kombit si shkak i punimeve për zhvendosjen e Urës së Re mbi Drin.
Policisë rrugore i është dashur disa herë të ndërpresë edhe procesin e zbarkimit të kamionit për të çliruar trafikun dhe kolonat e krijuara.
