Ministri izraelit i Mbrojtjes, Israel Katz, ka thënë të martën, më 17.03.2026 se ushtria izraelite ka vrarë shefin e sigurisë së Iranit dhe kreun e milicisë Basij në sulmet ajrore gjatë natës, derisa Teherani ka vazhduar sulmet kundër fqinjëve të Gjirit, të cilat kanë rritur çmimet e energjisë, raporton Reuters.
Katz ka theksuar në një deklaratë se është informuar nga ushtria se shefi i sigurisë së Iranit, Ali Larijani, është vrarë.
Media shtetërore iraniane ka publikuar një shënim të shkruar me dorë nga Larijani në përkujtim të marinarëve iranianë të vrarë në një sulm amerikan, funerali i të cilit pritej të martën, por nuk pati asnjë koment të menjëhershëm nga Teherani mbi vërejtjet e Katzit.
Larijani do të ishte figura më e lartë e vrarë qëkur lideri suprem, Ajatollah Khamenei, u vra në ditën e parë të sulmeve ajrore izraelito-amerikane më 28 shkurt.
Katz ka deklaruar se Gholamreza Soleimani, komandanti i forcave Basij të Iranit, është vrarë gjithashtu.
Milicia Basij është forcë paraushtarake nën kontrollin e Trupave të Gardës Revolucionare Islamike që përdoret shpesh për të shuar protestat brenda Iranit.
Zyra e kryeministrit izraelit, Benjamin Netanyahu, ka theksuar në një deklaratë se udhëheqësi izraelit kishte urdhëruar “eliminimin e zyrtarëve të lartë të regjimit iranian”.
Lufta SHBA-Izrael kundër Iranit është në javën e tretë, me të paktën dy mijë të vrarë dhe pa asnjë shenjë fundi në horizont. Ngushtica e Hormuzit mbetet kryesisht e mbyllur dhe aleatët e SHBA-së kanë refuzuar thirrjet e presidentit amerikan, Donald Trump, që të ndihmojnë rihapjen e rrugës ujore jetësore, përmes së cilës rrjedh rreth 20% e naftës dhe gazit natyror të lëngshëm global./Kallxo.com
