Izraeli ka inauguruar bankën e parë nëntokësore të gjakut në botë, rezistente ndaj raketave, njoftoi të martën Organizata Kombëtare Izraelite për Mjekësinë Emergjente dhe Transfuzionit, Magen David Adom.
Ndërtesa në qytetin Ramli, midis Tel Avivit dhe Jerusalemit, u përurua të hënën mbrëma, por pritet të jetë zyrtarisht funksional në fund të këtij viti, tha një zëdhënëse e MDA.
“Marrja e një transfuzioni gjaku, një dhuratë e pazëvendësueshme e jetës nga një i panjohur, është një kujtesë e rëndësishme se tani e tutje ne mund të ndihemi të sigurt falë kësaj qendre të re mbresëlënëse”, tha presidenti izraelit Isaac Herzog.
“Do të mbrojë rezervat e gjakut nga sulmet raketore, kimike dhe biologjike”
Banka Kombëtare e Gjakut u ndërtua për të “mbrojtur rezervat e rëndësishme strategjike të gjakut të Izraelit nga sulmet raketore, kimike dhe biologjike, si dhe nga tërmetet”, tha MDA në një deklaratë. Ndërtesa përbëhet nga gjashtë kate, tre prej të cilave janë nën tokë.
Miqtë amerikanë të Magen David Adom (AFMDA) përballojnë koston e ndërtimit të një banke gjaku në shumën prej rreth 135 milion dollarë. Objekti i ri pritet të ruajë rreth gjysmë milioni njësi gjaku, raportoi Jerusalem Post.
Në të kaluarën, shërbimet e urgjencës janë detyruar të pezullojnë procesin e dhurimit të gjakut gjatë sulmeve me raketa dhe të zhvendosin rezervat e gjakut në strehimore.
“Kjo qendër do t’i mundësojë Magen David Adom-it të shpëtojë jetë të panumërta në luftë dhe në paqe,” tha Catherine Reed, Kryeshefe Ekzekutive e AFMDA.
Ndërtesa e re ka mure veçanërisht të trasha çimentoje dhe mekanizma të shumtë mbrojtës në rast të një sulmi me armë biologjike ose kimike./FrontOnline/
