Ish-kryeministri dhe ish-kryetari i LDK-së, Isa Mustafa, ka thënë se është mirë me shëndet dhe çdo ditë po bëhet edhe më mirë.
Ai në një intervistë ekskluzive për Klan Kosovën deklaroi se nuk i mungon aspak politika dhe se ka pasë nevojë për pushim.
“T’iu them të drejtën jo, por po mundohem ta përcjell për aq sa kam kohë. Nuk më mungon angazhimi im, megjithatë shoh se kam pasë nevojë të pushoj dhe të largohem nga përgjegjësitë e drejtpërdrejta në politikë, sepse kur je aty nuk mund të qëndrosh dhe të mos marrësh përgjegjësi, të mos reagosh e mos ta ndjesh peshën publike të çdo gjëje që ndodh në këtë vend. Tani është një pozitë krejt tjetër, e sheh prej një këndi tjetër atë që ndodh dhe nuk e sheh vetëm nga aspekti se si dëshiron ti ta shohësh në pikëpamje të subjektit politik në krye të cilit kam qenë. Mundohem t’i shoh të gjithë nga një horizont i njëjtë”.
