Inspektorati Qendror i Mbikëqyrjes së Tregut (IQMT) ka intensifikuar kontrollet në të gjithë vendin me ardhjen e stinës së pranverës, duke synuar rritjen e sigurisë së produkteve në treg dhe mbrojtjen e konsumatorëve.
Sipas njoftimit zyrtar, fokusi i inspektimeve ka qenë tek produkte me rrezik potencial për shëndetin dhe sigurinë, përfshirë makineritë, pajisjet personale mbrojtëse, lodrat për fëmijë dhe artikuj të tjerë të ndjeshëm për përdorim të përditshëm.
Si rezultat i kontrolleve në terren, inspektorët e IQMT-së kanë identifikuar dhe larguar nga tregu një sasi të konsiderueshme produktesh që nuk përmbushnin standardet e kërkuara. Produktet janë sekuestruar në përputhje me legjislacionin në fuqi, kryesisht për mungesë të dokumentacionit teknik dhe tejkalim të afatit të përdorimit.
