Hetuesit e Inspektoratit Policor të Kosovës kanë filluar të ndërmarrin veprime hetimore ndaj pesë zyrtarëve policorë të angazhuar në Njësinë për Ndërhyrje të Shpejtë në kuadër të Departamenti Kufitar të Policisë së Kosovës.
Sipas njoftimit, bazuar në të dhënat fillestare hetimore dhe provat e siguruara deri në këtë fazë, ekziston dyshimi se zyrtarët policorë më 13.03.2026 gjatë ushtrimit të detyrës zyrtare kanë kryer veprën penale – përvetësimi në detyrë.
Sipas dyshimeve fillestare, zyrtarët policorë në këtë rast pasi paraprakisht kishin sekuestruar mbi 100 paketa me cigare nga persona të dyshuar për kontrabandë brenda territorit të Republikës së Kosovës, dyshohet se i kanë përvetësuar 24 paketa me cigare, rreth 12,500 pako cigare në vlerë rreth 30 mijë euro, kurse në Doganën e Kosovës i kanë dorëzuar vetëm 84 paketa me cigare, të cilat janë dyshuar si të kontrabanduara.
IPK njofton se pas veprimeve hetimore një zyrtar policor është arrestuar dhe me vendim të Prokurorisë së Mitrovicës i është caktuar masa e ndalimit për 48 orë kurse katër zyrtarët tjerë janë duke u hetuar në procedurë të rregullt.
IPK në interes të hetimit dhe pasi që natyra e veprës penale që lidhet drejtpërdrejt me keqpërdorimin e detyrës zyrtare dhe integritetin e zyrtarit policor i ka rekomanduar Policisë së Kosovës suspendimin e pesë zyrtarëve policorë të përfshirë si të dyshuar në këtë rast.
Klikoni KËTU për tu bërë pjesë e kanalit të TV Prizreni në Youtube.
