Një interesim i jashtëzakonshëm po mbretëron për finalen e gjashtë mes KB Trepça dhe KB Bashkimi, që pritet të zhvillohet sonte nga ora 19:00 në palestrën “Minatori” në Mitrovicë.
Tri orë përpara se të nisë zyrtarisht shitja e biletave, plot tifozë janë mbledhur pranë palestrës, me shpresën për të siguruar një vend në tribuna për këtë përballje të zjarrtë.
Sipas njoftimit të klubit, biletat do të dalin në shitje në ora 12:00, në Fan Shopin e Trepçës.
Për shkak të interesimit të madh për finalen dhe për sigurinë e të gjithëve, KB Trepçka ka njoftuar se nuk lejohet hyrja me një biletë për dy persona, përfshirë edhe fëmijët.
Aktualisht, seria është 3:2 për ‘Xehetarët’. Trepça është vetëm një fitore larg mbrojtjes së titullit të kampionit, ndërsa Portokallezinjtë nga Prizreni kërkojnë fitoren për të barazuar serinë në 3:3 dhe për të shtyrë gjithçka në finalen e madhe të së dielës.
Seria nisi me triumfin e Bashkimit 84:77, por më pas Trepça reagoi fuqishëm duke fituar tri ndeshje radhazi – 79:72, 88:71 dhe 80:74.
Megjithatë, në sfidën e fundit, prizrenasit rikthyen emocionin në këtë finale, me një fitore 85:77.