Shoqata e Kosovës për Kërkim dhe Shpëtim ka njoftuar se edhe të martën, më 08.04.2025, janë duke vazhduar kërkimet për gjetjen e shtetasit shqiptar, Ajet Lleshi, 26-vjeç, në zonën malore të Pashtrikut, në Cahan të Shqipërisë.
Në njoftimin e saj, Shoqata e Kosovës për Kërkim dhe Shpëtim ka demantuar disa informacione që po qarkullojnë në rrjete sociale e media jozyrtare.
“Shoqata e Kosovës për Kërkim dhe Shpëtim demanton fuqishëm informacionet e përhapura në disa rrjete sociale dhe media jozyrtare, të cilat pretendojnë se personi është gjetur i vdekur. Këto informacione janë të pavërteta dhe nuk bazohen në të dhëna zyrtare apo të konfirmuara nga autoritetet përgjegjëse” – ka njoftuar kjo Shoqatë.
Me këtë rast, Shoqata ka ftuar qytetarët dhe mediat të bazohen vetëm në njoftimet zyrtare dhe të mos shpërndajnë informata të pasakta që mund të dëmtojnë procesin e kërkimit dhe familjarët e të zhdukurit.
“Për çdo zhvillim të mëtejmë, do të jeni të informuar nga burimet zyrtare” – ka shtuar Shoqata.