Prokuroria Themelore e Pejës ka nisur procedurat para hetimore për dy raste të vdekjes të cilat janë cilësuar si të dyshimta.
Të dy trupat e pa jetë, janë dërguar për obduksion për shkak se dyshohet se kanë vdekur si pasojë e helmimit nga uji i pijshëm.
Zëdhënësi i Prokurorisë Themelore në Pejë, Shkodran Nikçi, ka bërë të ditur për Gazetën Online ‘Reporteri.net’, se për shkak të situatës së krijuar në Deçan nga rastet e dyshuara për helmim nga uji, prokurori kujdestar i Departamentit të Krimeve të Rënda, ka urdhëruar që trupat e pajetë të dërgohen në Institutin e Mjekësisë Ligjore për obduksion.
“Gjatë 24 orëve të fundit, kanë ndodhur dy vdekje të dyshimta në komunën e Deçanit. Për shkak të situatës se krijuar në atë rajon, Prokurori kujdestar i Departamentit të Krimeve të Rënda, ka urdhëruar që trupat e pajetë të dërgohen për obdukim në IML për të kuptuar me shumë lidhur me rrethanat e vdekjes se tyre”, tha Nikçi për Reporterin.
Për helmimin e qytetarëve nga Deçani deri tani nga krerët e institucioneve të vendit ka reaguar vetëm presidentja Vjosa Osmani.
“Pres nga të gjitha institucionet angazhim të mëtejmë e të plotë në ofrimin e trajtimit adekuat shëndetësor për qytetarët e helmuar, si dhe zbardhjen e shkaqeve që kanë çuar në helmimin e qytetarëve. Një hetim nga organet e drejtësisë është i domosdoshëm dhe duhet të trajtohet me urgjencë”, ka shkruar Osmani në Facebook.
Por deri më tani asnjë fjalë nuk e kanë thënë kryeministri Albin Kurti dhe ministri i Shëndetësisë, Arben Vitia.
Për mosreagimin e Kurtit dhe Vitisë ka reaguar deputetja e AAK-së që vije nga Deçani, Time Kadrijaj, e cila ka thënë për Gazetën Online “Reproteri.net” se ata nuk po merren seriozisht me këtë rast.
“Marre për qeverinë dhe ministrin Arben Vitia, asnjë telefonatë mos me bërë. Edhe në këtv moment ka raste të reja që qytetarët po kërkojnë ndihmë”, ka deklaruar ajo për Reporterin.
Ndërsa kryetari i Komunës së Deçanit, Bashkim Ramosaj, dje ka deklaruar se helmimi mund të jetë edhe i qëllimshëm, pasi që ka thënë se kjo nuk është hera e parë që ndodhë diçka e tillë.
Kurse drejtori i IKSHPK-së, Naser Ramadani, dje ka informuar opinionin se nga mostrat e dërguara në laborator dhe rezultatet nga analizat fiziko-kimike, rezultojnë në kufinjtë e lejuar në përputhje me parametrat e përcaktuara.
Ai ka thënë se brenda 24 orëve të para, në fshatrat Gramaqel, Prilep, Baballoq dhe Gllogjan janë shfaqur disa koloni të dyshimta të baktereve koliforme për të cilat nevojitet një hulumtim laboratorik, për të parë nëse ka ndonjë infektim gastrointestinal eventual. /Reporteri.net/.