Deputetja e Lëvizjes Vetëvendosje, Albulena Haxhiu, ka theksuar se partia e saj është e hapur për bashkëpunim me Nismën Socialdemokrate, në përpjekje për të tejkaluar ngërçin institucional që po zgjat tashmë prej më shumë se katër muajsh.
Megjithatë, ajo ka qenë e qartë në qëndrimin se propozimi për kryetarin e Kuvendit i takon LVV-së si fituese e zgjedhjeve të 9 shkurtit.
“Sa i përket takimeve me Nismën, ne kemi thënë që kemi vullnet për bashkëpunim. Ato do të ndodhin, do të ketë takim të kryetarit Kurti me kryetarin Limajn dhe pas përmbylljes së takimeve do të ketë njoftim për opinionin publik nëse do të ketë apo jo marrëveshje”, ka deklaruar Haxhiu pas përfundimit të seancës së 48-të të pasuksesshme për konstituimin e Kuvendit të Kosovës.
Duke iu referuar bllokadës për zgjedhjen e kryekuvendarit, Haxhiu theksoi se kandidimi i saj për këtë pozitë është i bazuar në legjitimitetin që i është dhënë partisë së saj nga zgjedhjet, por mungesa e votave ka pamundësuar përmbylljen e procesit.
“Së pari, unë nuk e kam karrigen e kryekuvendarit. Jam e propozuar nga LVV për këtë pozitë, por kjo nuk ka ndodhur për faktin se duhen 61 vota. Situata është e tillë që deputetët e opozitës vijnë në seancë, por nuk marrin pjesë fare në votim”, tha ajo.
Në seancën e sotme, të 48-tën me radhë, në sallë ishin të pranishëm 100 deputetë, por vetëm 51 prej tyre morën pjesë në votim, pa asnjë votë kundër dhe pa asnjë abstenim duke bërë që Kuvendi të mos konstituohet sërish. /Telegrafi/