Ministrja e Drejtësisë, Albulena Haxhiu, thotë se Instituti i Krimeve të kryera gjatë luftës në Kosovë do të kontribuojë në përmbushjen e të drejtave të viktimave.
“Pas një pune shumë të gjatë dhe interzive Qeveria e Kosovës ka hartuar dhe themeluar Institutin i cili ka për qëllim hulumtimin dhe dokumentin e shkeljeve të rënda të njeriut gjatë luftës në Kosovë që përfshinë para dhe pas luftës në Kosovë, pra të qershorit 1999 deri 31 dhjetori 2000”.
“Ligji në fjalë rregullon veprimin e Institutit kompetencat dhe përgjegjësitë e tij, ushtrimin e veprimtarisë me qëllim të dokumentimit dhe hulumtimit, strukturën organizative dhe funksionale, mbrojtjen e të dhënave dhe bashkëpunimin e instituti me institucione vendore e ndërkombëtare”.
“Ky Institut do t’i kontribuojë përmbushjes së të drejtave të viktimave dhe të tjerëve për të ditur të vërtetën dhe të drejtën për drejtësi dhe ndjekjes penale të autorëve të krimit, identifikim e të viktimave dhe planifikimin e saktë të memorialëve po ashtu edhe rishkrimin e teksteve shkollore”, tha Haxhiu.
Haxhiu, në seancën e Kuvendit, theksoi se ky Institut do të hulumtojë dhe dokumentojë të gjitha llojet tjera të dëmeve që u shkaktuan gjatë luftës, njofton Klankosova.tv.
“Instituti do të hulumtojë dhe dokumentojë krimet e kryera gjatë luftës në aspektin historik, ushtarak, ekonomik, juridik, kulturor, psikologjik, mjeko-ligjor e aspekte të tjera që janë të rëndësishme. Po ashtu, do të hulumtojë dhe dokumentojë krimet e kryera gjatë luftës duke siguruar të dhëna për viktimat, personat e lënduar, dëmet e luftës, dëmet fizike e shpirtërore dhe psikologjike, dëmeve ekonomike e ambient dhe lloje të tjera të dëmeve që u shkaktuan gjatë luftës” tha Haxhiu.