Kryetari i Aleancës për Ardhmërinë e Kosovës, Ramush Haradinaj, u ka uruar mirëseardhje mërgimtarëve për festat e fundvitit, si dhe ka kërkuar nga Qeveria që të largojë masën e ndalimit të qarkullimit.
Ai, me anë të një postimi në rrjetin social Facebook, ka shkruar se Kosova duhet t’i mirëpres motrat dhe vëllezërit jashtë vendit.
“Rrugët tuaja drejt vendlindjes nuk u ndalën asnjëherë, as dikur në rrethana okupimi e as sot në liri. Ju i jepni kuptim festave të fundvitit, të cilat do të ishin të zbehta pa ju dhe kjo jo vetëm për faktin që familjet çmallen me ju, por edhe gjallërimi që i bëni ekonomisë së shtetit tonë të përbashkët, vendlindjes tuaj”.
“U bë më shumë se një vit që edhe Kosova po përballet me pandeminë, ashtu sikur vendet ku jetoni e punoni ju. Fatmirësisht, në këtë fazë ne kemi shumë më pak të infektuar. Sot i bëj thirrje Qeverisë së Kosovës, që të heqin masën e ndalim qarkullimit, për të mundësuar kështu, udhëtim të lirë e të papengesa për diasporën tonë. Ne duhet t’i mirëpresim motrat e vëllezërit tanë, e jo t’i kufizojmë me masa që ekspertët po i konsiderojnë jo shkencore dhe jo të nevojshme për menaxhimin e pandemisë. Të dashur bashkatdhetarë. Mirë se vini në shtëpinë tuaj!”, ka thënë Haradinaj.
Klikoni KËTU për tu bërë pjesë e kanalit të TV Prizreni në Youtube.
