Kryetari i Aleancës për Ardhmërinë së Kosovës (AAK), Ramush Haradinaj, ka pritur sot përfaqësuesin e posaçëm të BE-së për dialogun Kosovë-Serbi, Peter Sorensen, me të cilin thotë se ka biseduar për rëndësinë e partneritetit BE-SHBA dhe për sukseset e arritura në Kosovë dhe në rajon.
Përmes një postimi në Facebook, Haradinaj ka bërë të ditur se Sorensenin e ka njoftuar për qëndrimin e Aleancës për të dhënë kontribut të drejtpërdrejtë në formimin sa më të shpejtë të institucioneve të reja.
“Në takim çmova rolin e tij dhe të Bashkimit Evropian, duke theksuar po ashtu rëndësinë e partneritetit BE–SHBA për sukseset e arritura në Kosovë dhe në rajon. E njoftova Sorensen për qëndrimin e Aleancës për të dhënë kontribut të drejtpërdrejtë në formimin sa më të shpejtë të institucioneve të reja, të dala nga zgjedhjet, si dhe për angazhimin tonë në rikthimin e vendit në rrugën e integrimit euro-atlantik” – ka shkruar Haradinaj.
Klikoni KËTU për tu bërë pjesë e kanalit të TV Prizreni në Youtube.
