Kreu i AAK-së, Ramush Haradinaj, përmes një postimi në rrjetin social facebook, ka reaguar sërish për sulmin ndaj Ibër Lepencit, duke e quajtur me përmasa terroriste ndaj infrastrukturës së ujit në veri, njëherit që shënon aktin më barbar kundër Kosovës në krejt periudhën e pasluftës dhe është sulm i drejtpërdrejtë ndaj popullit të Kosovës.Tutje Haradinaj, thotë se Aleanca me SHBA-të është përgjigja më e mirë ndaj Rusisë dhe satelitit të saj, Serbisë, ku gjithashtu ka kërkuar edhe hetim ndërkombëtar.
Ndër të tjera ai thotë se situata e krijuar është shumë më serioze se një luftë hibride, apo propagandë kundër opozitës.Postimi i plotë:
Në mbrojtje të Kosovës, me çdo çmim!Sulmi i mbrëmshëm me përmasa terroriste ndaj infrastrukturës së ujit në veri, shënon aktin më barbar kundër Kosovës në krejt periudhën e pasluftës dhe është sulm i drejtpërdrejtë ndaj popullit të Kosovës. Ai për cak ka pasur nxjerrjen jashtë funksionit të dy segmenteve jetike, furnizimin me ujë dhe energji, me qëllim shkaktimin e një krize me përmasa të paparashikueshme. Skenarë të tillë sot shohim veç në agresionin rus ndaj Ukrainës.
Prandaj sot, përpos dënimit me forcë ndaj këtij sulmi terrorist, gjithë energjitë tona duhet të fokusohen në zbulimin dhe kapjen e kriminelëve dhe në zbardhjen e skenarëve për destabilizimin e Kosovës. Për këtë qëllim e kemi të domosdoshme edhe ndihmën e partnerëve strategjikë të sigurisë, apo një hetim ndërkombëtar.Situata e krijuar është shumë më serioze se një luftë hibride, apo propagande kundër opozitës, medias e analistëve, siç po provon ta devijojë Kryeministri. Sulmet me përmasa agresioni kundër vendit tënd, nuk janë kalkulator për vota.
Në mbrojtje të Kosovës, me çdo çmim!
Aleanca me 🇺🇸 është përgjigja më e mirë ndaj Rusisë dhe satelitit të saj, Serbisë
