Grabitjet e vjedhjet nëpër shtëpi e banesa përveç që po sjellin humbje të mëdha, po shkaktojnë edhe pasiguri e ankth te qytetarët, që shpesh përballen me hajdutët, të cilët i zënë në flagrancë. Kështu ka ndodhur në orët e para të ditës së sotme në një shtëpi në rrugën “Vetim Shala” në Prizren, raporton Gazeta Sinjali.
Rasti ka ndodhur në lagjen Ortakoll, ku pronari i një shtëpie ka kërkuar ndihmën e Policisë, pasi dyshohet se u ballafaqua me grabitësin, i cili përveç që ‘avulloi’ disa gjësende me vlerë, ai edhe gjuajti edhe me armë zjarri.
Bazuar në dëshminë e tij të dhënë para zyrtarëve policorë, i dyshuari kishte depërtuar brenda shtëpisë me forcë dhe e tmerroi kur papritmas i doli i maskuar dhe i armatosur. Ata fillimisht u përleshën me njëri-tjetrin, ku i dyshuari gjuaji me armë për ta zmbrapsur pronarin e shtëpisë.
