17-vjeçari me iniciale V.N. është gjetur i shtrirë në tokë pa shenja jete buzë rrugës nga Landovica drejt Gjonajt.
Lajmin për KALLXO.com e konfirmoi Shaqir Bytyqi, zëdhënës i Policisë së Rajonit të Prizrenit.
Sipas Bytyqit, dyshohet se derisa i mituri ishte duke drejtuar një motoçikletë nuk u është përshtatur kushteve dhe rrethanave të rrugës dhe ka humbur kontrollin dhe ka dalë nga rruga dhe është përplasur në murin mbrojtës të një shtëpie në ndërtim. Viktima ka pësuar lëndime të rënda trupore që kanë rezultuar me vdekje në vendin e ngjarjes.
“Sot më datë 14 tetor 2025, rreth orës 16:00, policia është njoftuar se në rrugën Landovicë–Gjonaj, disa qytetarë që po punonin në ara kanë vërejtur një person të shtrirë nën rrugë, rreth 7–8 metra larg saj, pranë një muri ku po ndërtohej një shtëpi. Sipas raportimeve fillestare të qytetarëve, personi nuk shfaqte shenja jete”- tha Bytyqi,
Madje ai theksoi se nga veprimet hetimore është konstatuar se viktima që nga mbrëmë nuk ishte kthyer në shtëpi dhe nuk ishte lajmëruar në telefon, ndërsa sot është raportuar si i zhdukur.
Më tej, organet e rendit thonë se bashkë me Prokurorinë po e hetojnë rastin.