Komuna e Prizrenit përmes Drejtorisë së Turizmit dhe Zhvillimit Ekonomik, fton të gjithë zejtarët dhe bizneset turistike – hoteliere të aplikojnë në Programin e Trajnimit për Ngritjen e Kapaciteteve që është pjesë e Projektit “Ringjallja e Zejeve dhe Ndërtimi i Kulturës për Zhvillimin e Përbashkët Turistik”. Projekti ndërkufitar i financuar nga BE-ja zbatohet nga Komuna e Prizrenit – Republika e Kosovës, Komuna e Tetovës – Republika e Maqedonisë së Veriut, CEED Maqedonia dhe CEED Kosova.
Qëllimi i këtij projekti është ta përshpejtojë zhvillimin e turizmit në rajonin e Pollogut dhe rajonet ekonomike të Jugut përmes përmirësimit të cilësisë dhe diversifikimit të ofertës së bizneseve të zejtarisë dhe mikroturizmit dhe mikpritjes (THS), duke rezultuar në rritjen e atraktivitetit të rajonit dhe vizitorëve më të kënaqur.
Programi i trajnimit ofron njohuri dhe aftësi të vlefshme për ta zhvilluar modelin e biznesit dhe planin e biznesit, marketingun digjital dhe shitjet në internet, si dhe dizajnin e brendimin e produktit.
