Forca e Sigurisë së Kosovës (FSK) po merr pjesë në ushtrimin ndërkombëtar “Dynamic Front 26”, i organizuar nga Ushtria Amerikane për Evropë dhe Afrikë (USAREUR-AF), me një kontingjent nga Regjimenti i Tretë i Këmbësorisë, përfshirë një togë mortajash.
Ushtrimi shumëkombësh synon testimin e ndërveprueshmërisë së forcave të NATO-s dhe atyre partnere në fushën e artilerisë dhe zjarrit indirekt, ndërsa po zhvillohet paralelisht në Gjermani, Rumani, Poloni, Spanjë dhe Turqi.
FSK është dislokuar në Grafenwöhr Training Area në Gjermani me kapacitetet e veta logjistike dhe ka vepruar në bashkëpunim me Regjimentin 4-319 të Artilerisë Fushore të Ushtrisë së SHBA-së dhe me trupa të Ushtrisë Italiane.
Gjatë ushtrimit, FSK ka demonstruar aftësitë profesionale në qitje me mortaja ditën dhe natën, duke shkëmbyer përvoja dhe praktika me forcat partnere ndërkombëtare.
