Kryeministri i Republikës së Kosovës, Albin Kurti ka marrë pjesë në forumin Ekonomik Zvicër-Kosovë 2024, duke thënë se Kosova dhe Zvicra kanë një partneritet të fortë, kulturor e politik.
Përmes një njoftimi për media thuhet se Kurti ka thënë se është e natyrshme që kjo lidhje forcohet ekonomikisht çdo ditë.
“Ne jemi të bekuar me këtë partneritet, ose më mirë, me këtë miqësi të vërtetë. Ndaj më vjen mirë që ky forum na ofron mundësinë për të thelluar këtë partneritet, veçanërisht në fushën e tregtisë, investimeve dhe inovacionit teknologjik”, veçoi kryeministri, teksa theksoi se “Për Kosovën, Zvicra është destinacioni i pestë më i madh i eksporteve dhe në vitin 2022 për herë të parë kemi shënuar bilanc pozitiv tregtar me Zvicrën duke eksportuar mallra në vlerë prej 64 milionë euro dhe importuar mallra në vlerë prej 39 milionë euro”.
Kurti tha se jemi të përkushtuar për të krijuar një mjedis biznesi që tërheq investime dhe nxit një rritje të qëndrueshme.
“Së bashku, le të hapim rrugën për një partneritet më të fortë dhe më të begatë ndërmjet Kosovës dhe Zvicrës”, tha Kurti. /Telegrafi/