Zgjedhjet e jashtëzakonshme parlamentare në Republikën e Kosovës janë mbajtur më 14 shkurt 2021.
Por cerfikimi i rezultateve nga ana e Komisionit Qendror të Zgjedhjeve edhe këtë vit po merr kohë.
Aktualisht KQZ-ja po pret procedimin e ankesave të kandidatëve të subjekteve politike në Panelin Zgjedhor për Ankesa dhe Parashtresa, organ i cili do të vendos brenda afatit ligjor prej 72 orëve, për të certifikuar zgjedhjet.
Agnesa Haxhiu nga Instituti Demokratik i Kosovës në një prononcim për IndeksOnline pati deklaruar se në të kaluarën presidenti ka ftuar zakonisht seancën konsitutive gati në përfundim të afatit kushtetues prej 30 ditësh për t’iu dhënë kohë edhe subjekteve politike që të krijojnë konsensusin e nevojshëm për krijimin e institucioneve.
Por siç duket, u.d së presidentes Vjosa Osmani nuk do ta pret fundin e 30 ditëshit për të ftuar seancën konstituive.
Artan Murati, këshilltar ligjor i Osmanit, për IndeksOnline ka thënë se pas certifikimit të rezultateve, u.d së presidentës do ta thërras këtë seancë sa më parë që është e mundur.
“Siç e dini, rezultatet nuk janë certifikuar ende. Pas certifikimit të rezultateve, nuk do të pritet 30 ditë për të thirrur seancën konstituive. Presidentja do të thërras këtë seancë sa më parë që të jetë e mundur, në pajtim me dispozitat në fuqi”, tha Murati.
Ndryshe, zëdhënësi i Lëvizjes Vetëvendosje, Përparim Kryeziu ka deklaruar për media se institucionet e reja do të formohen brenda javësh.
