Ka filluar të enjten heqja e kamerave ilegale nga rrugët e komunës së Shtërpcës.
Burime të “Betimi për Drejtësi” brenda Prokurorisë Themelore në Prishtinë konfirmojnë se sot në një aksion të koordinuar me Agjencinë për Informim dhe Privatësi (AIP) dhe Policinë e Kosovës (PK), kanë filluar largimin e kamerave ilegale nga rrugët e Shtërpcës.
I gjithë aksioni është duke u ndërmarrë në zbatim të Ligjit për Mbrojtjen e të Dhënave Personale, pasi këto kamera kanë regjistruar dhe përpunuar të dhëna personale të qytetarëve pa u ditur se nga kush po bëhen, pra pa u përmbushur kriteret ligjore.
Shkelja e të dhënave personale është një fenomen për të cilin vazhdimisht ka ankesa, e një mënyrë e shkeljes së të dhënave është edhe ajo e vendosjes së kamerave ilegale.
Çështja e domosdoshmërisë vendosjes së kamerave në hapësirat publike ku është e nevojshme është përmendur shumë herë si e metë e komunave, sidomos në Prishtinë, teksa është theksuar se në hapësirat ku nuk lejohen, janë të vendosura ato.
Pavarësisht se ligjin për mbrojtjen e të dhënave, e përcakton qartë se cilat janë ato të dhëna që duhet të mbrohen e që nuk e shkelin ligjin për mbrojtjen e të dhënave personale, shkeljet vazhdojnë të ndodhin dhe se vendosja e kamerave pa një leje përkatëse, e ka shtuar nevojën edhe të rishikimit të ligjit, për shkak se shumë herë kamerat që vendosen në shtëpi, kapin edhe hapësira që e tejkalojnë hapësirën private.
