Komuna e Prizrenit ka njoftuar se të martën, më 8 prill 2025, do të nisin punimet për ndërtimin e një rrethrrotullimi të ri në udhëkryqin ndërmjet rrugëve “Ekrem Rexha – Tirana” dhe “Ramadan Bush” (pranë KFOR-it Turk).
Sipas njoftimit të publikuar nga kryetari i Komunës, Shaqir Totaj, ky projekt është pjesë e angazhimeve për përmirësimin e infrastrukturës rrugore dhe rritjen e sigurisë në komunikacion. Rrethrrotullimi i ri pritet të ndihmojë në lehtësimin e qarkullimit dhe organizimin më efikas të trafikut në këtë pjesë të qytetit, si dhe të ofrojë një rrjedhë alternative për automjetet, duke ulur ngarkesën në rrethrrotullimin ekzistues te ish “Bellona”.
“Ky projekt është një hap i rëndësishëm drejt zgjidhjes së problemeve të trafikut në këtë zonë të ngarkuar. Me ndërtimin e këtij rrethrrotullimi, synojmë të rrisim sigurinë për të gjithë pjesëmarrësit në komunikacion dhe të përmirësojmë rrjedhën e lëvizjes së automjeteve,” thuhet në njoftimin e kryetarit Totaj.
Autoritetet komunale u bëjnë thirrje qytetarëve që, përkohësisht, të shmangin qarkullimin në këtë aks rrugor, për të mundësuar realizimin e punimeve pa pengesa.
Komuna falënderon qytetarët për mirëkuptimin dhe bashkëpunimin gjatë periudhës së zhvillimit të projektit.
