Familja e Liridon Rexhepit, kosovarit që u arrestua të martën në Stamboll, është e bindur se djali i tyre është i pafajshëm dhe se nuk është i përfshirë në pretendimet që thuhen.
Rexhepi u arrestua nën dyshimin se e ka menaxhuar rrjetin financiar të Mossadit në Turqi. Mossadi është agjencia kombëtare e inteligjencës e Izraelit.
Në një reagim të martën vonë, familja Rexhepi ka thënë se janë të gatshëm për bashkëpunim me secilin institucion të Kosovës dhe të Turqisë për ta sqaruar situatën.
“Njëjtë sikur ju, edhe ne jemi të shqetësuar, njëkohësisht të befasuar, me arrestimin e vëllait tonë, Liridonit, nga autoritetet turke në Stamboll. Ne jemi të bindur që vëllai ynë është i pafajshëm, ngase asnjëherë të vetme nuk jemi të përfshirë në pretendimet që thuhen, as ne si familje, e as Liridoni. Jemi të gatshëm për bashkëpunim me secilin insitucion të Kosovës apo edhe të Turqisë për ta sqaruar situatën. Të gjitha informatat eventuale, do të përcjellën përmes të autorizuarit tonë avokatit Arianit Koci”, thuhet në porosinë e familjes, e cila është përcjellë nga avokati Arianit Koci në Facebook.
