Mediumi ndërkombëtar “Euronews” i ka kushtuar një artikull të veçantë qytetit të Prizrenit, duke e cilësuar atë si kryeqytetin kulturor të Kosovës dhe duke rekomanduar vizitorët se si t’i kalojnë 24 orë në këtë qytet historik.
Në artikull thuhet se, ndonëse Kosova mbetet ndër vendet më pak të vizituara në Evropë, ajo nuk mungon me atraksione kulturore dhe historike. Gazetari i “Euronews Travel” ka zgjedhur Prizrenin për vizitën e tij, duke e përshkruar qytetin si destinacionin ideal për të përjetuar historinë, kulturën dhe atmosferën autentike të Kosovës.
Mes vendeve që rekomandohen për t’u vizituar janë Ura e Gurit, Sheshi Shadërvan, Xhamia e Sinan Pashës, Kisha “Zoja e Ljevishës”, Kalaja e Prizrenit, Muzeu i Lidhjes Shqiptare të Prizrenit dhe Muzeu Arkeologjik i vendosur në një hamam të periudhës osmane.
