Dy zyrtarë të Policisë së Kosovës kanë përfunduar me sukses programin ndërkombëtar të Internshipit dhe shkëmbimit të përvojave policore në Universitetin Policor të Brandenburgut në Gjermani.
Programi është zhvilluar nga 3 deri më 7 gusht 2026, me pjesëmarrjen e zyrtarëve policorë nga vende dhe organizata të ndryshme ndërkombëtare.
Gjatë programit, pjesëmarrësit kanë zhvilluar aktivitete të përbashkëta profesionale dhe taktiko-operative, përfshirë ushtrime për arrestime dhe kontrolle të objekteve, trajtimin e rasteve të dhunës në familje, si dhe vizita në njësi të ndryshme të Policisë Gjermane, përfshirë policinë ujore dhe njësitë e specializuara.
Në kuadër të programit janë zhvilluar edhe vizita në Berlin dhe në Bundestagun Gjerman, ndërsa shkëmbimi i përvojave me kolegë nga vende të ndryshme ka krijuar mundësi për krahasimin e praktikave dhe standardeve bashkëkohore policore.
Sipas njoftimit, gjatë ushtrimeve praktike për trajtimin e rasteve të dhunës në familje, qasjet dhe metodat e prezantuara nga zyrtarët e Policisë së Kosovës janë vlerësuar pozitivisht dhe kanë qenë pjesë e shkëmbimit profesional me pjesëmarrësit ndërkombëtarë.
Pjesëmarrja në këtë program, sipas Policisë së Kosovës, kontribuon në forcimin e bashkëpunimit ndërkombëtar dhe në avancimin e mëtejshëm të profesionalizmit dhe praktikave policore në vend.
Programi ndërkombëtar vlerësohet gjithashtu si një mundësi për vazhdimin dhe zgjerimin e bashkëpunimit ndërmjet Policisë së Kosovës dhe Universitetit Policor të Brandenburgut, përmes trajnimeve praktike, programeve të internshipit dhe shkëmbimit të përvojave.
