Dy shtëpi janë përfshirë nga flakët të shtunën mbrëma në Rahovec dhe Zubin-Potok.
Policia ka njoftuar të dielën se shtëpia në rrugën “Malush Meriqi” në Rahovec është përfshirë nga zjarri në rrethana të panjohura rreth orës 22:00, teksa flakët janë përhapur edhe te kulmi i një shtëpie tjetër në afërsi të saj.
Sipas Policisë, si pasojë e shpërthimit të zjarrit janë shkaktuar dëme të konsiderueshme materiale, ndërkaq nuk është raportuar për të lënduar.
“Raportohet se në rrethana të pa njohur në zjarr është përfshirë shtëpia e ankuesit mashkull kosovar, ndërsa nga zjarri është përfshirë edhe kulmi i një shtëpie tjetër afër saj me ankues mashkull kosovar. Zjarrfikësit kanë shuar zjarrin. Nuk raportohet për të lënduar”, kanë thënë nga Policia.
Hetimet për rastin tashmë kanë filluar, ku pritet të zbardhen rrethanat dhe shkaktarët që çuan deri tek incidenti.
Lidhur me rastin në Zubin-Potok, ankuesi ka njoftuar se një shtëpi është duke u djegur rreth orës 19:00.
Rrethanat se si ka ndodhur deri te incidenti nuk dihet, ndërsa zjarrfikësit edhe në këtë rast kanë arritur ta shuajnë atë.
Rasti është duke u hetuar.