Dhoma e Tregtisë dhe Industrisë në Kosovë, përmes një komunikate për media, ka shprehur shqetësimin për situatën e rënduar të furnizimit me energji elektrike, e cila sipas DhTIK, po shkakton humbje serioze për qindra biznese në vend.
DhTIK thotë se përkundër rritjes së çmimit të energjisë elektrike për 16.1% dhe daljes së detyruar në tregun e hapur të energjisë të rreth 1,300 bizneseve, gjendja e furnizimit është përkeqësuar ndjeshëm.
“Bizneset po paguajnë shumëfish për energji elektrike, ndërkohë, furnizimi nuk është as i sigurt dhe as i qëndrueshëm. Ndërprerjet e shpeshta dhe të paplanifikuara të energjisë kanë sjellë pasoja të rënda, përfshirë pamundësi të funksionimit normal të bizneseve, rritje të kostove të prodhimit, humbje të orëve të punës dhe dëme në pajisjet teknologjike dhe linjat e prodhimit” – thekson DhTIK.
