Deputetja e PDK-së, Blerta Deliu-Kodra, e ka paditur ministren e Drejtësisë, Albulena Haxhiu, për shpifje.

Ajo ka njoftuar se padinë e ka dorëzuar në gjykatë të premten.

“Në Gjykatë, sot kam dorëzuar padinë për shpifje ndaj ministres së Drejtësisë, Albulena Haxhiu – aty ku të pavërtetat e saj në studio televizive pres të marrin përgjigjen e merituar. Tendenca që me shpifje dhe fyerje ndaj opozitës me e zhvendosë vëmendjen nga skandalet korruptive të kësaj qeverie, nuk kalon. As nuk frikësohemi e as nuk zmbrapsemi nga angazhimi ynë për të denoncuar krimin dhe korrupsionin e këtij pushteti”, ka thënë Deliu-Kodra.

Ministrja Haxhiu kishte kërkuar shkarkimin e deputetes së PDK-së nga pozita e anëtares së Komisionit për kompensimin e viktimave të krimit, që funksionon në kuadër të ministrisë, me arsyetimin se kishte munguar shumë herë.