Policia e Kosovës dje ka arrestuar dy persona, të cilët dyshohet se kanë pranuar para në emër të zyrtarëve të Ministrisë së Bujqësisë, duke premtuar “ushtrim ndikimi” për futjen e dy aplikuesve në listën e përfituesve të granteve.
Lidhur me rastin, dy personat e dyshuar Fatlind Idrizi dhe Shukri Xhaferi janë arrestuar në flagrancë nën dyshimin për kryerjen e veprës penale të lartëcekur.
Burime të Indeksonline bëjnë me dije se vetë ministri i Bujqësisë, Faton Peci kishte bërë denoncim.
Siç thonë burimet tona, disa fermerë kanë ndarë informacione me ministrin, i cili më pas është vënë në lëvizje dhe ka denoncuar rastin, ku më tutje të dyshuarit edhe janë kapur.
Rasti në fjalë është hetuar nga Drejtoria për Hetimin e Krimeve Ekonomike dhe Korrupsionit – Sektori i Hetimeve të Korrupsionit në koordinim me Prokurorinë Speciale të Republikës se Kosovës.
Lidhur me këtë, ka reaguar ministri Faton Peci i cili ka përshëndetur veprimin e organeve të drejtësisë në luftimin e dukurive negative.
Ai tha se veprimet e ndërmarra nga organet e rendit dhe të drejtësisë janë një shembull i mirë në luftimin e dukurive të tilla.
“Mbetem i përkushtuar në luftën kundër tentativave të tilla, krimit dhe korrupsionit. I falënderoj bujqit tanë për bashkëpunim dhe ndarje të informacioneve me ne dhe organet e rendit, si dhe i inkurajojmë ata që edhe në të ardhmen t’i denoncojnë parregullsitë dhe tentativat e tilla negative”, tha me këtë rast ministri Peci./Indeksonline/