Që nga fillimi i sulmit të tyre këtë vit, luftëtarët talibanë kanë shpërndarë imazhe të pajisjeve ushtarake që kanë marrë nga qeveria – përfshirë helikopterë sulmues dhe automjete të blinduara.
Talibanët gjithashtu kanë në dorë artileri, mjete ajrore pa pilot (UAV), pushkë, pistoleta, sipas qendrës së ekspertëve të mbrojtjes RUSI. Një pjesë e kësaj është konfiskuar nga bazat ushtarake afgane. Të tjerët janë dorëzuar nga ushtarët që kanë dezertuar nga forcat qeveritare.
Por Dr Jack Watling, një studiues në RUSI, thotë se talebanët nuk kanë ekspertizën për t’i përdorur dhe mirëmbajtur ato, dhe ata ndoshta kanë pasur pak ndikim në fushën e betejës.
Një shqetësim më i madh është qasja e tyre në pajisjet e imazhit termik dhe të shikimit të natës, dhe pajisjet optike – të cilat mund të ngjiten në armë për të përmirësuar saktësinë e tyre.
Talibanët tashmë po shesin disa nga armët e tyre të vjedhura jashtë, në Azinë Qendrore dhe Lindjen e Mesme, dhe kjo ka të ngjarë të zgjerohet në Afrikën Lindore, thotë Dr Watling. Ndikimi i kësaj mund të jetë i rëndë, raporton BBC.
“Kur keni një disponueshmëri të përhapur të armëve, kjo lehtëson më shumë përplasje të armatosura sepse keni një opozitë më të mirë të armatosur,” thotë Dr Watling. “Kjo është diçka që ndoshta do të fillojmë ta shohim dhe ta ndiejmë gjatë muajve të ardhshëm.”
Me gjithë këtë armatim shtesë, ekziston gjithashtu rreziku i luftimeve të zgjatura në Afganistan nëse talibanët nuk përmbushin kërkesat popullore.
“Shumë nga djemtë që ishin në njësitë ushtarake afgane do t’i kishin marrë armët në shtëpi, sinqerisht për të mbrojtur familjet e tyre,” thotë Dr Watling. “Kështu që ju keni shumë njerëz që janë të armatosur mirë dhe kanë një stërvitje ushtarake, të cilët mund të vendosin se nuk duan që gjërat të bëhen siç duan talebanët”.
