Bashkimi i Sindikatave të Pavarura të Kosovës (BSPK), njoftoi se greva e përgjithshme po zhvillohet, por që sipas këtij institucioni, nuk ka reflektim të Qeverisë ndaj kërkesave.
BSPK-ja shkroi në Facebook të hënën se Qeveria duhet t’ua dëgjojë hallet dhe të merret seriozisht me shqetësimet e të punësuarve, derisa potencoi se Qeveria duhet ta ftojë në takim sa më parë, “për të mirën e të gjithëve”.
“BSPK është në pritje të hapjes së dialogut të mirëfilltë social midis partnerëve socialë ashtu si e do rregulli dhe si e thotë ligji”, thuhet në komunikatë.
Greva e përgjithshme në Kosovë nisi më 25 gusht, derisa grevistët paralajmëruan se nuk do ta pezullojnë deri në realizimin e premtimeve. Ndër kërkesat e grevistëve është përgatitja e ligjit të pagave.
