Bashkimi i Sindikatave të Pavarura të Kosovës (BSPK), ka bërë të ditur të martën, se dialogu social është e vetmja mënyrë për të dalë nga greva në sektorin publik, e cila ka nisur më 25 gusht.
BSPK-ja përmes një komunikate për media, ka thënë se ky dialog duhet të bëhet ndërmjet partnerëve sociale, qeverisë dhe BSPK-së dhe jo në forma të tjera të komunikimit.
“Takimet konsultative të Kryetarit të BSPK-së me të gjithë ata që e duan zgjidhjen nëpërmjet dialogut social, si edhe takimi konsultativ me presidenten është vetëm gjetja e rrugës së duhur për hapjen e dialogut të duhur social ndërmjet partnerëve socialë dhe jo diçka tjetër siç jepet a siç do të dëshironin të ishte nga ata që përhapin informacione jo të sakta.
Prandaj duam edhe njëherë t’ia përcjellim opinionit të gjerë se e vetmja zgjidhje e duhur dhe e qëndrueshme për dalje nga Greva e Përgjithshme është dialogu social ndërmjet Partnerëve Socialë, Qeverisë dhe Bashkimit të Sindikatave të Pavarura të Kosovës dhe jo format e tjera të komunikimit”, thuhet në komunikatë.
Punonjësit e sektorit publik po kërkojnë 100 euro shtesë në muaj deri në miratimin e Ligjit për Paga, i cili ende nuk është proceduar për lexim në Kuvend.
