Kryeministri i Shqipërisë, Edi Rama, ka thënë se protestat në Shqipëri janë kurth i ngritur që kërkon gjak.
“Jam përpjekur të mos përfshihem, por të ndjek e të koordinoj me shumë durim një përpjekje aspak të lehtë për të mos rënë në kurthin e ngritur të dhunës që kërkon gjak. Kërkohet gjak”, është shprehur Rama në një video-live të publikuar në profilin e tij në Facebook.
Ai ka thënë se e njeh mirë historinë e bulevardit, duke kujtuar edhe ngjarjet e 21 janarit.
“Unë e di historinë e këtij bulevardi, e njoh mirë. I kam ende të freskëta në kujtesë ato që ndodhën më 21 janar, ku pati disa zjarre sporadike, tek-tuk në këtë perimetër, por nuk u prek asnjë institucion, nuk u hodh asnjë molotov dhe nuk u dëmtua e as u dogj askush nga forcat e rendit”, ka deklaruar kreu i qeverisë.
Rama ka pranuar se dëmet e shkaktuara nuk janë të vogla, por ka shtuar se ato do të riparohen.
Ai ka thënë se përballë kësaj dhune qëndrojnë policët. Protestuesit, Rama i ka quajtur “turmë të maskuar”.
“Ata që përpiqen t’u nxjerrin sytë policëve dhe t’i vrasin, janë kriminelë, por janë fëmijët e këtij vendi. Dëmet nuk janë të vogla, por ndreqen. Imazhet që transmetojnë televizionet tregojnë të ashtuquajturin grup të zjarrit, që nuk ka lidhje me studentët. Kjo është një dhunë e verbër që nuk ka asnjë lidhje me rininë shqiptare”, u shpreh Rama. “Në këto orë nuk po sfidohem unë, nuk po sfidohet qeveria, por po sfidohet Shqipëria evropiane”.
Klikoni KËTU për tu bërë pjesë e kanalit të TV Prizreni në Youtube.
