Protestat janë rruga e vetme që u ka mbetur bizneseve për të kërkuar miratimin e Ligjit për rimëkëmbje ekonomike, ka thënë kryetari i Odës Ekonomike të Kosovës, Berat Rukiqi. Kjo deklaratë vjen në ditën kur në Kuvend nuk pati kuorum për të mbajtur seancën për shqyrtimin e dytë të Projektligjit për Rimëkëmbjen Ekonomike dhe kur Qeveria mori vendime për ndalimin e veprimtarive të bizneseve për fundjavë në gjithë vendin.
“Ka presion të jashtëzakonshëm nga bizneset për organizim të protestave dhe formave tjera të kundërshtimeve për stërzgjatjen e miratimit të ligjit për rimëkëmbjen ekonomike dhe vendimet e fundit që lidhen me menaxhimin e pandemisë”, ka shkruar Rukiqi në Facebook duke thënë shtuar se “barrën sociale të pandemisë po e paguajnë bizneset”.
