Bashkimi Evropian përshëndet zbatimin e marrëveshjes në mes të Kosovës dhe Serbisë, për dokumentet hyrëse-dalëse, që filloi në mesnatë.
Një zëdhënës i Bashkimit Evropian ka nënvizuar se bëhet fjalë për një rezultat pozitiv që lehtëson lirinë e lëvizjes dhe është një zgjidhje evropiane.
“Marrëveshja për dokumentet e tregon se një qasje konstruktive dhe pragmatike sjell rezultate pozitive dhe ne u bëjmë thirrje të dyja palëve që të përdorin dialogun e lehtësuar nga BE-ja, si platformë për të adresuar dhe zgjidhur të gjitha çështjet e hapura ndërmjet tyre në mënyrë të ngjashme, duke përfshirë targat”, ka porositur ky zëdhënës, duke shtuar se qëndrimi i Bashkimit Evropian në lidhje me targat është bërë disa herë i qartë.
Gjithnjë, sipas këtij burimi, konform marrëveshjeve në dialog që datojnë nga viti 2011 dhe 2016, Kosova ka të drejtë të heqë gradualisht tabelat KM.
“Megjithatë, është e rëndësishme që të jepet kohë e mjaftueshme për zbatimin e këtij plani dhe që ai të përgatitet dhe zbatohet në konsultim të ngushtë me qytetarët e prekur dhe në përputhje me praktikat e mira evropiane”, thotë ky zëdhënës për RTK dhe shton se konkluzionet e marrëveshjes së vitit 2016 përfshinin afate kohore shumë më të gjata kohore për riregjistrimin, të cilat duhet të ofrojnë udhëzime për procesin në fjalë tani.