Bashkimi Evropian ka reaguar pas aksionit në veri, për mbylljen e pesë institucioneve paralele ilegale në veri.
Në reagim thuhet se BE-ja është e zhgënjyer dhe se ky aksion nuk ishte i koordinuar me BE-në dhe partnerët ndërkombëtarë.
“BE-ja është e zhgënjyer për mungesën e vazhdueshme të koordinimit me ofruesit e sigurisë së Kosovës dhe me partnerët ndërkombëtarë”.
“Operacioni i Policisë së Kosovës kundër zyrave të mbështetura nga Serbia në Mitrovicën e Veriut, Zveçan, Zubin Potok dhe Leposaviq, i zhvilluar me udhëzime të Qeverisë së Kosovës, rrezikon situatën e brishtë të sigurisë në terren. EULEX-i u vendos menjëherë për të monitoruar zhvillimin e këtij operacioni, i cili nuk ishte i koordinuar me BE-në dhe partnerët ndërkombëtarë”, thuhet në reagim.
BE-ja ka thënë se po e përsëritë që Kosova është zotuar për depërshkallëzim, duke thënë se Kosovës vazhdimisht i është bërë thirrje Kosovës që të shmangë çdo veprim që mund të ndikojë negativisht në sigurinë e njerëzve, por sipas BE-së, thirrjet janë shpërfillur nga Qeveria e Kosovës.
“BE dëshiron të përsërisë se Kosova është zotuar për depërshkallëzim. BE-ja vazhdimisht i ka bërë thirrje Kosovës që të shmangë çdo veprim që mund të ndikojë negativisht në sigurinë e njerëzve në terren. Fatkeqësisht thirrjet tona janë shpërfillur nga Qeveria e Kosovës”.
“BE-ja dëshiron të përsërisë se operacioni aktual i policisë kundër zyrave të mbështetura nga Serbia mund të çojë në përshkallëzim të mëtejshëm të një situate tashmë të paqëndrueshme”.
“Zyrat e mbështetura nga Serbia janë paraparë të adresohen dhe zgjidhen në dialogun e lehtësuar nga BE-ja. Ne presim që Kosova dhe Serbia të adresojnë dhe zgjidhin çështjet e hapura mes tyre në dialogun e lehtësuar nga BE-ja”, thuhet tutje në reagim.
Ndërkaq, zëdhënësi i BE-së, Peter Stano ka shpërndarë në “X” deklaratën e Zyrës së BE-së në Kosovë, duke thënë se hapat e fundit po rrezikojnë përshkallëzim të mëtejshëm.
“Deklarata për hapat e fundit të njëanshëm dhe të pakoordinuar në veri nga autoritetet e Prishtinës, duke rrezikuar përshkallëzim të mëtejshëm”, ka shkruar Stano.