Kryetari i Sindikatës së Sektorit Privat të Kosovës, Jusuf Azemi, ka thënë se me vendimin për vlerën e koeficientit prej 105 eurosh janë stimuluar punëtorët që kanë paga prej 700-800 eurosh, e jo ata që kanë paga prej 200 eurosh.
Në një konferencë për media të premten, Azemi ka deklaruar se punëtorët e sektorit privat kryejnë punë për institucionet publike, derisa ka shtuar se me pakon për luftimin e inflacionit janë goditur punëtorët e sektorit privat.
“Ne u goditem haptazi nga pakoja e luftimit te inflacionit, Qeveria duke e ditë qe punëtoret e sektorit kanë 3 herë paga me te vogla, ndau mjete për ata te sektorit publik dhe jo ata privat, punëtoret janë shume të zhgënjyer, neve na qiti në cilësinë e lëmoshës, është stimuluar punëtori që merr 700- 800 euro paga e jo ai që merr 200 euro”, ka thënë Azemi.
Sipas tij, vetëm ndërmjet viteve 2020-2021, nga Kosova kanë ikur 92 mijë punëtorë me leje pune.
Azemi ka folur edhe për sigurinë e punëtorëve, duke thënë se vetëm këtë vit janë shënuar tri raste të vdekjes në vendin e punës.