Inspektorati Policor i Kosovës ka njoftuar se është arrestuar një zyrtar policor i dyshuar për veprën penale “sulm seksual”.
Sipas IPK-së, zyrtari policor i njësitit rajonal të komunikacionit në Gjilan, dyshohet për sulm seksual ndaj një të miture.
“Inspektorati Policor i Kosovës respektivisht Departamenti i Hetimeve ditë më herët kishte pranuar një informacion sipas të cilit dyshohej se një zyrtar policor i (i Njësisë Rajonale të komunikacionit rrugor në Gjilan) kishte kryer veprën penale “sulm seksual”. Në koordinim me Prokurorinë Themelore në Gjilan hetuesit e IPK-së kanë filluar procedurën hetimore që ka përfshirë edhe autorizimin e përdorimit të masave të fshehta të hetimit. Si rezultat i veprimeve hetimore janë siguruar dëshmi në bazë të të cilave dyshohet se zyrtari policor ka kryer veprën penale të “sulmit seksual” ndaj viktimës së këtij rasti (një e mitur). Bazuar në këto dyshime, sot në orët e pasdites është arrestuar zyrtari policor (i cili ishte jashtë detyrës zyrtare) dhe me vendim të prokurorit kompetent të njëjtit i është caktuar masa e ndalimit për 48 orë. Përveç arrestimit, si pjesë e procedurës administrative i dyshuari (zyrtari policor) është suspenduar deri në përfundim të hetimit”, thuhet nga IPK-ja.
Po ashtu zyrtari policor është suspenduar deri në fund të hetimit. Ndërsa IPK-ja ka njoftuar se do të merren edhe veprime tjera hetimore lidhur me këtë rast.