Arrestohet një person në Prizren nën dyshimin për përfshirje në tregti të ndaluar

Policia e Kosovës ka njoftuar se hetuesit policorë nga Njësia Rajonale për Hetimin e Krimeve Ekonomike dhe Korrupsion në Prizren, pas një hetimi, kanë arritur të sigurojnë prova se ekziston dyshimi i bazuar se një i dyshuar, në lokalin e tij (kioskë) dhe në depo në Prizren, posedon dhe shet cigare dhe produkte të tyre, të llojeve të ndryshme pa tiketa (banderola) të RKS-së.

“Sot, më 20.06. 2025 me fillim në ora 08:35, ka filluar implementimi i planit operativ “Luftimi i ekonomisë jo formale”, i cili ishte i fokusuar në tri lokacione dhe mbështetur me aktvendim për urdhër kontrolli lëshuar nga Gjykata Themelore në Prizren. Në këtë plan kanë asistuar edhe NJRHKEK – Prishtinë, NJRHKEK- Gjakovë, Dogana e Kosovës – Njësia Anti kontrabandë”, njofton policia.

Sipas policisë, gjatë kontrollit janë gjetur dhe sekuestruar:

– 318 pako (6365 cope), cigare pa banderola dhe me banderola të Serbisë,

– 256 cigare elektronike të llojeve të ndryshme pa banderola,

– 19 aparate për cigare elektronike pa banderola,

– 4550gr. shije për shisha, pa banderola,

– 80 copë me mbishkrimin “snus” pa banderola,

– 3000 copë filtra cigaresh, pa banderola.

“Dëshmitë e lartshënuar janë sekuestruar nga njësia e Doganës. Me aktvendim të prokurorit të rastit, është caktuar masa e paraburgimit (48 orë), për të dyshuarin E.T., (viti i lindjes 1992, mashkull kosovar) dhe ndaj tij është iniciuar rasti ‘tregti e ndaluar’.”, thuhet tutje në njoftimin e policisë.