12 persona janë arrestuar në qytetin e Ferizajt, pasi të njëjtit dyshohen për keqpërdorim të pozitës zyrtare
Prokuroria njofton se në mesin e të arrestuarve janë katër teknik të pylltarisë, katër rojtar të pyjeve si dhe katër qytetar nga komuna e Ferizajt, ndaj të cilëve i’u është caktuar masa e ndalimit për 48 orë, shkruan Reporteri.net.
Njoftimi i Prokurorisë:
Prokuroria Themelore në Ferizaj, njofton se në muajin tetor 2020, nga një sinjalizues i Institucionit të Komunës së Ferizajt, ka pranuar informacione se është duke u kryer vepra penale e “Keqpërdorimit të pozitës apo autoritetit zyrtar” si dhe “Marrja e ryshfetit “dhe “Dhënia e Ryshfetit”, nga zyrtarët e Drejtorisë për Bujqësi dhe Pylltari në komunën e Ferizajt.
Ndërsa, pas vlerësimit të këtij informacioni, Prokuroria Themelore në Ferizaj, Departamenti i Krimeve të Rënda, së bashku me Drejtorinë e Krimeve Ekonomike në Prishtinë dhe Njësinë e Krimeve Ekonomike në Ferizaj, Prokuroria ka konsideruar se duhet te aplikohen masat e fshehta teknike të vëzhgimit dhe hetimit.
“Ndërsa, pas aplikimit të këtyre masave disa mujore, sot më 15 Prill 2020, janë arrestuar 12 persona të dyshuar, në mesin e tyre katër (4) teknik të pylltarisë, katër (4) rojtar të pyjeve si dhe katër (4) qytetar nga komuna e Ferizajt, ndaj të cilëve i’u është caktuar masa e ndalimit për 48 orë”, njofton prokuroria.
Prokuroria Themelore në Ferizaj, brenda afatit ligjor, ndaj të njëjtëve, do të paraqesë kërkesë për caktimin e masës së paraburgimit në Gjykatën Kompetente në Ferizaj. /Reporteri.net/.
Klikoni KËTU për tu bërë pjesë e kanalit të TV Prizreni në Youtube.
