Real Madrid po synon trofeun e tretë të sezonit këtë të diel, teksa përgatitet të përballet me Barcelonën në finalen e Superkupës së Spanjës.
“Los Blancos” do të kërkojnë të përsërisin suksesin e vitit të kaluar në Arabinë Saudite, ku fituan 4-1 falë një tregolëshi nga Vinicius Junior.
Carlo Ancelotti foli për mediat të shtunën para ndeshjes dhe konfirmoi se do të ketë në dispozicion Aurelien Tchouameni, Federico Valverde dhe Jude Bellingham për përballjen ndaj Barcelonës, pasi të tre lojtarët pësuan dëmtime gjatë fitores në gjysmëfinale kundër Mallorcas të enjten (sipas MD).
“Arrijmë në këtë ndeshje në formë të mirë, me shumë entuziazëm dhe dëshirë. Problemet që patëm kundër Mallorcas janë zgjidhur dhe të gjithë lojtarët janë në dispozicion. Bellingham është mirë, është rikuperuar mirë. Kjo është shumë e rëndësishme sepse ai ka qenë në një formë shumë të mirë. Ai është një lojtar që në këtë moment ka bërë diferencën.”
Ancelotti gjithashtu ndau mendimet e tij se si beson se skuadra e tij mund të jetë fitimtare të dielën.
“Në El Clasico, cilësia mbizotëron mbi balancën e ekipit dhe kjo është një nga arsyet pse Clasicos e fundit kanë qenë pak më të çrregullt. Një aspekt i rëndësishëm në ndeshjen e nesërme është mbrojtja. Nëse mbrohesh mirë, ka më shumë mundësi për të fituar.”
/GazetaSinjali/