Agjencia e Menaxhimit të Emergjencave (AME) ka deklaruar se vendi është duke u përballur me një situatë të vështirë nga temperaturat e larta, ku si pasojë vetëm gjatë javës së fundit janë paraqitur 320 raste të zjarreve malore, fushore por edhe në objekte. Aktualisht sipas AME-së shtatë zjarre janë aktive dhe po punohet që të shuhen plotësisht.
Drejtori i AME-së, Genc Metaj, në një konferencë për media të mbajtur të martën, tha se deri më tani kanë humbur jetën një zjarrfikës nga komuna e Gjakovës e një qytetar nga komuna e Klinës. Ai shtoi tha se janë dy zjarrfikës të lënduar, në komunën e Lipjanit dhe Vitisë.
“Bazuar në paralajmërimet nga Institutit Hidrometeorologjik i Kosovës nga temperaturat e larta vendi është duke përballur me një situatë të vështirë, ku si pasojë janë paraqitur shumë zjarre në të gjithë vendin. Vetëm gjatë javës së fundit janë raportuar mbi 320 raste të zjarreve duke përfshirë zjarre malore, fushore por edhe objekte. Për të gjitha këto raste kemi intervenuar me sukses, pas intervenimit dhe koordinimit gjendja aktuale është stabile, momentalisht i kemi shtatë zjarre aktive dhe po punohet që edhe këto të shuhen plotësisht. Ky numër i madh dhe pasojat e mëdha që mund të sjellin këto zjarre janë alarmante. Fatkeqësisht kemi humbur një zjarrfikës nga Gjakova, gjithashtu e ka humbur jetën një qytetar nga komuna e Klinës. Për momentin i kemi të lënduar dy zjarrfikës një nga komuna e Lipjanit dhe Vitisë”, tha Metaj.
Ndërkaq, drejtori i Policisë së Kosovës, Gazmend Hoxha tha se janë arrestuar gjithsej nëntë persona për zjarrvënie. Ai tha se deri më tani Policia ka intervenuar 211 herë dhe numri i rasteve të zjarrvënieve të iniciuara në polici dhe rrezikut të përgjithshëm, është 63.
“Policia e Kosovës ka marrë një varg aktivitetesh, po ashtu ka marrë pjesë edhe vet me autobotet tona që tu ndihmojmë AME dhe të gjitha institucionet tjera për parandalimin dhe përhapjen e zjarreve. Ne jemi duke bërë dhe hetime, kemi dy vepra penale sipas kodit penal që është shkaktimi i rrezikut të përgjithshëm dhe po ashtu zjarrvënie. Numri i përgjithshëm i zjarreve i raportuar në Kosovë është 183, numri i zjarrvënieve është 54, numri i personave të arrestuar është gjithsej 9, numri i intervenimeve të policisë është 211 dhe numri i rasteve të iniciuar në polici të zjarrvënies dhe për shkak të rrezikut të përgjithshëm është 63. Policia e Kosovës do të jetë në krye të detyrës dhe po ashtu nuk do të ketë fare hezitim që të merren me persona që shkelin ligjet tona”, theksoi Hoxha.
Në këtë konferencë u theksua se sfidë mbetet vetëdijesimi i qytetarëve për të mos ndezur zjarre të qëllimshme.
Kosova po përballet me temperatura të larta maksimalet e të cilave pritet të arrijnë në 39 gradë Celcius në fund të kësaj jave./KP