Ambasadori i Francës në Beograd, Pierre Cochard, ka thënë se ata e shohin si të njëanshëm aplikimin e Kosovës për në Këshill të Evropës dhe se nuk mbështesin vendime të tilla.
Ai tha se Franca e sheh si prioritet dialogun në Bruksel teksa shtoi se beson se prioritet është çështja e personave të pagjetur edhe Asociacioni i Komunave me Shumicë Serbe.
“Ne nuk mbështesim vendime të njëanshme. Në këtë kontekst, ne besojmë se prioritet është dialogu për temat – Asociacioni i Komunave me shumicë serbe në Kosovë, çështjet e energjisë, çështjet e personave të pagjetur – ky është prioriteti”, citohet të ketë thënë Cochard në Nova S.
Tutje, sipas Cochard, dialogu në Bruksel duhet të marrë një dinamikë të re sa më shpejt të jetë e mundur dhe se Franca mbështet përpjekjet e BE-së dhe Gjermanisë në lidhje me këtë.
“Është një çështje urgjente sepse ka hapësirë që duhet të përdoret për dialog për të lehtësuar normalizimin gradual të marrëdhënieve”, tha ai.
I pyetur nëse Franca do të votojë pro anëtarësimit të Kosovës në Këshillin e Evropës, Cochard vetëm ka ripërsëritur se prioritet i Francës është vazhdimi i dialogut.
