Kryeministri i Kosovës, Albin Kurti, ka thënë se nuk kanë marrë një premtim nga Franca skeptike për heqjen e vizave për kosovarët.
Ai, në një intervistë për radiotelevizionin publik, deklaroi se Franca e ka marrë mesazhin e Kosovës që është e padrejtë që qytetarët e saj ende kanë regjim të vizave.
“Sigurisht që qytetarët e Kosovës janë të interesuar për liberalizimin e vizave dhe është e padrejtë që Kosova pas plotësimit të kritereve ende nuk e ka të hequr regjimin e vizave. Më 18 korrik bëhen tri vjet prej se Komisioni Evropian ka thënë se Kosovës duhet t’i hiqen vizate. Kjo temë është trajtuar. Unë jam i bindur që ata e kanë marrë mesazhin tonë, por s’ka zotim nga ana e tyre që do të ketë heqje të regjimit të vizave”.
“Kishim takim mes Ministrit të Punëve të Brendshme Xhelal Sveçla dhe kolegut të tij francez i cili takim u përqendrua në aspektet teknike të sundimit të ligjit. Ne kemi luftuar korrupsionin dhe krimin e organizuar, ka luftim të suksesshëm të trafiqeve, si dhe drastikisht ka rënë numri i migrimeve. Mbase mund të shpresojmë që sado pak kjo vizitë ka ndikuar që Franca ta eliminojë skepticizmin, por s’mund të them se morëm premtim. Duhet të punojmë me Holandën”.
Klikoni KËTU për tu bërë pjesë e kanalit të TV Prizreni në Youtube.
