Me shpërthimin e luftës në Ukrainë, është vërejtur një panik i shtuar edhe te qytetarët në Kosovë. E për këtë arsye gjatë të premtes, para Komisionit për Mbikëqyrjen e Agjencisë së Kosovës për Inteligjencë ka raportuar drejtori Petrit Ajeti. Kryetarja e Komisionit, Ganimete Musliu, ka njoftuar qytetarët se nuk ka vend për panik dhe se gjendja e sigurisë në vend është stabile.
Lidhur me gjendjen e sigurisë në vend, gjatë të premtes, drejtori i Agjencisë së Kosovës për Inteligjencë, Petrit Ajeti, ka raportuar në Komisionin për Mbikëqyrjen e këtij institucioni.
Pas përfundimit të raportimit, kryetarja e këtij komisioni, Ganimete Musliu, ka ftuar qytetarët që të mos bëjnë panik, pasi siguria kombëtare është stabile.
“Edhe në këtë drejtim diskutuam me drejtorin dhe mesazhi i tij dhe i imi si kryetare e komisionit dhe i gjithë komisionit është që të mos ndjellim. Gjendja është stabile dhe nuk kërcënohemi drejtpërdrejt nga ndonjë pasiguri. Dua që përmes juve t’i siguroj qytetarët e RKS-së se nuk ka vend për panik”, ka thënë ajo.
Ajo e ka quajtur shqetësuese situatën e panikut të qytetarëve për t’u furnizuar me rezerva në derivate dhe artikuj bazë.
Për çka ka kërkuar që të deklarohen edhe presidentja Vjosa Osmani dhe kryeministri Albin Kurti.
Ndërsa Policia Kufitare në Zubin Potokut njoftoi se mbrëmë në fshatin Bube patrulla policore në rrugë ka vërejtur të vendosura disa pengesa me drurë, të cilat ishin vendosur në rrugë me qëllim për të penguar qarkullimin e automjeteve.
Në vendin e ngjarjes kanë dalë edhe njësi të tjera patrulluese kufitare dhe kanë larguar pengesat. Policia thotë se është duke kryer hetime lidhur me rastin.