Kryetari i Komunës së Prishtinës, Shpend Ahmeti, ka bërë edhe një tjetër reagim lidhur me situatën e krijuar në Kosovë, nga epidemia e koronavirusit.
Ahmeti shkruan se ka paradoks të madh në gjendjen ekonomike në vend, që të cilat kanë pasoja marramendëse tek qytetarët.
”Paradoksi më i madh i situatës në Kosovë që ka pasoja marramendëse tek ne!
Shteti/qeveria i/e Republikës së Kosovës i ka në bankë qendrore të mbledhura nga ATK e Doganat e të pashpenzuara sot më 18 Nëntor 2020 më shumë se 1 (miliardë) Euro.
Po, Po mirë e lexuat – 1 MILIARDË EURO!
Prej vendimeve që qeverisë së kaluar për ndalimin e Investimeve Kapitale e deri te moslëvizja e qeverisë së tanishme janë akumuluar fonde marramendëse. Kur teoria kryesore në krejt botën është e shpenzimeve e kërkesës agregate, ne kemi shkuar në drejtimin e kundërt me kursime”.
Sipas tij, për dallim nga veprimi global, Kosova ka marrë para nga ekonomia dhe po i mban në bankë.
”Krejt bota merr kredi për të futur kapital të shumë-nevojshëm në ekonomi, ne kemi marr para nga ekonomia dhe po i mbajmë në bankë. PRA, përveç krizës ne kemi marr nga qytetarët dhe nuk kemi gjet mënyrë me e kthy.
Ne s’paskemi nevojë as të kreditohemi as të shpikim shpenzime e transfere nga trusti. Vetëm gjysma e këtyre fondeve të kthehej në këtë periudhë përmes programeve kreative do të kishte ndikim të madh.
Nuk është koha për konzervatizëm e kontabilitet. Është koha për kreativitet e shpenzim”.