Kryetari i Lidhjes Demokratike të Kosovës, Lumir Abdixhiku, tha se Qeveria e Kosovës duhet të procesojë tutje për themelimin e Asociacionit të Komunave me Shumicë Serbe, në bazë të vendimi të Gjykatës Kushtetuese.
Në një intervistë për KP, lideri i LDK-së, i kërkoi Kurtit të sqarojë pozicionin e vet para qytetarëve për ketë temë, të cilën e ka kundërshtuar në të kaluarën.
Ai përmend edhe deklarimin e fundit të Kurtit në Austri se asociacioni mund të jetë pjesë e marrëveshjes në kuadër të planit franko-gjerman për dialogun.
“Në vizitën në Austri ku bëhet një pranimi që (asociacioni) të jetë pjesë e marrëveshjes dhe mund të jetë pjesë e marrëveshjes. Dhe e dyta në deklaratën e Borrell në mbrëmjen e marrëveshjes së targave ku specifikisht thuhet se palët janë pajtuar që të zbatojnë gjitha marrëveshjet paraprake. Për LDK-në këto qëndrime nuk janë qëndrime të reja këto, pasi ne konsiderojmë se gjitha marrëveshjet paraprake duhet të implementohen brenda kushtetutshmërisë së Kosovës”.
Tutje, Abdixhiku tha se kërkesa për themelimin e asociacionit është e ShBA-së dhe “njerëzve që e donë Kosovën përnjëmend”.
“Ne kemi një vendim të Gjykatës Kushtetuese dhe në bazë të tij duhet të procesojmë tutje. Tani i takon udhëheqësve shtetëror që të bëjnë këtë procesim tutje”, është shprehur Abdixhiku, transmeton Klankosova.tv.
Tutje, ai thotë se i takon qeverisë që të përcaktojë fatin e vet politik, teksa shtoi se në parlament janë partia e tretë me numër të deputetëve ku siç tha “nuk mund të ndryshojmë shumicën në vend”.
“I takon qeverisë që të bëjë zgjidhje, nëse nuk është e aftë të jep një zgjidhje dhe vendos të largohet prej detyrave të tyre kushtetuese, ne nuk mund të ndryshojmë fatin e një vendimi të tillë. Por në pushtet je për të marrë vendime dhe shtyrë agjenda ndërkombëtare dhe vendore, por që përputhen të dyja bashkërisht”, është shprehur Abdixhiku.
