Kryetari i Lidhjes Demokratike të Kosovës, Lumir Abdixhiku, ka mirëpritur dekretin e presidentes së vendit për shpërndarjen e Kuvendit të Kosovës, duke e vlerësuar si një veprim në mbrojtje të rendit kushtetues dhe funksionimit të institucioneve.
Në një reagim në Facebook, Abdixhiku tha se partia që ai drejton mbështet qëndrimin e presidentes Vjosa Osmani, duke theksuar se vendimi i saj tregon përgjegjësi dhe qartësi kushtetuese.
Sipas tij, zhvillimet politike që çuan në këtë situatë nuk mund të prodhojnë, siç u shpreh ai, debate artificiale apo zvarritje procedurale që do ta vendosnin vendin jashtë rregullave institucionale.
