Aleanca për Ardhmërinë e Kosovës i ka rekomanduar Qeverisë që me urgjencë ta dërgojë në Kuvendin e Kosovës Ligjin për Pagat.
Deputeti Shemsedin Dreshaj ka thënë se Qeveria Kurti po e vë vendin në krizë.
“Ne i rekomandojmë si AAK Qeverisë që me urgjencë të sjellë Ligjin e Pagave në Kuvend, që qeveria të merret seriozisht me arsimin dhe shëndetësinë duke implementuar ligjin për sigurime shëndetësore dhe duke bërë plotësim ndryshimin e ligjit për skemat pensionale të financuara nga shteti”, tha ai në një konferencë për media të premten.
Dreshaj shtoi se Qeveria nuk po u ofron zgjidhje qytetarëve dhe se po i varfëron ata.
“Kjo Qeveri po prodhon vetëm kriza e jo zgjidhje. Qeveria për një vit vazhdon të prodhojë kriza ekonomike, politike e të mirëqenies në vend duke varfëruar qytetarin. Greva e sotme e sindikalistëve vërteton se kjo qeveri qytetarëve nuk po u ofron zgjedhje por krizë”, tha ai.
Ai tha se mësimdhënësit po diskriminohen dhe se për shkak të pazotësisë së Qeverisë ata gjenden në situatë të rëndë.
“Mësimdhënësit që dikur ishin shtyllë e rezistencës kundër armikut, tani në liri po diskriminohen. Qeveritarët ta kenë të qartë se dalja në rrugë e mësimdhënësve nuk bëhet nga qejfi, por nga zori. Ata gjendjen në situatë shumë të rëndë socio-ekonomike dhe në këtë situatë gjenden për shkak të pazotësisë së qeverisë”, theksoi Dreshaj.